ភ្នំពេញ៖ មេបញ្ជាការទទួលកិច្ចការនគរបាលសហព័ន្ធអូស្ត្រាលីប្រចាំនៅតំបន់អាស៊ី លោក Peter Sykora បានចូលសម្តែងការគួរសម និងពិភាក្សាការងារជាមួយអគ្គស្នងការដ្ឋាននគរបាលជាតិ លោកនាយឧត្តមសេនីយ៍ នេត សាវឿន នៅថ្ងៃទី០៨ ខែមីនា ឆ្នាំ២០២៣។
ក្នុងកិច្ចជំនួបនោះ លោក Peter Sykora បានសន្យានៅចំពោះមុខលោកឧត្តមសេនីយ៍ នេត សាវឿន ថានគរបាលសហព័ន្ធអូស្ត្រាលី នឹងបន្តគាំទ្រនគរបាលជាតិកម្ពុជាលើការបើកវគ្គបណ្តុះបណ្តាលជំនាញជូនដល់មន្ត្រីសិក្ខាកាម ដើម្បីយកទៅបំពេញភារកិច្ចឲ្យចំគោលដៅ។
អគ្គស្នងការដ្ឋាននគរបាលជាតិបានថ្លែងអំណរគុណដល់នគរបាលសហព័ន្ធអូស្រ្តាលីប្រចាំតំបន់អាស៊ី ដែលកន្លងមកបានជួយជ្រោមជ្រែងផ្តល់ទីប្រឹក្សាក្នុងការដាក់ចេញនូវយុទ្ធសាស្ត្រគោលនយោបាយនគរបាលជាតិកម្ពុជា ជួយគាំទ្របង្កើតក្រុមការងារប្រឆាំងបទល្មើសឆ្លងដែន (TCT) និងការជួយបណ្តុះបណ្តាលទាំងការកសាងសមត្ថភាពមន្ត្រី ការជួយមធ្យោបាយ សម្ភារៈ និងគម្រោងធំៗដទៃទៀត។
ជាមួយគ្នានេះលោក នេត សាវឿន បានស្នើឱ្យភាគីអូស្រ្តាលីជួយគាំទ្របន្ថែមទៀត ជាពិសេសគឺការបណ្តុះបណ្តាលជំនាញប្រយុទ្ធប្រឆាំងបទល្មើសបច្ចេកវិទ្យា ដែលជាប្រភេទបទល្មើសកំពុងមាននិន្នាការកើនឡើងជារួមនៅក្នុងបណ្តាប្រទេសតំបន់អាស៊ី៕
